قصيدة " خايف على أطفالي من السياسي " للشاعر صباح الهلالي

قصيدة " خايف على أطفالي من السياسي " للشاعر صباح الهلالي

حرت ما بين أبطل بين أجاريك
بسك يا شعر محتاج راسي
أنه لساني متر والموت شبرين وخايف على أطفالي من السياسي
كلشي يجوزلك واشتكتب يجوز فدوة أرجوك بس عوف الكراسي
اكتب عالغزل عالفرح عالخير لأن شعبك ولا شايف مآسي
البصر مرات يخدع بالك تشوف باوع عالوضع بعيون حولة
اغمد سيف حرفك بالك تثور العمر مرهون بالحرف التكوله
النفط والغاز يوصل بالأنابيب بس عن الحسد خلينه جولة
لتهدد صرح يلسقفك تراب عندي أطفال مو وكت البطولة
ترف جلد الحياية ارسمهه وتعيش أموتك يا قلم من ترسم طيور
حاير بالوطن شعليك ؟ شتريد ؟!ّ بيتك من خشب لتسب القصور
عمر صار أربعين نعيش عميان تعلمنه العمى شيفيدنه النور !
شعليك الحواجز حاطن البيت عندك بيت خاطر تبجي عالسور !
الناس بلا عقل لا تنصح الناس منو أنت تجي وتريد تفسير
بالك تنتفض فكرك ترة تروح اشبي هسه الوضع وتريد تغيير !
ابتلى المسئول بلوة بحصة الناس !
بشر هوة شني المسئول شيصير ؟؟؟
الحصة اللي تجي والما تجي تهون
علي مو جان ياكل خبزة ش......... ؟؟؟
امدح لا تذم المدح هم زين يسقط هالشعب تحيا السياسة !
اجة نص الأمان الباقي هم جاي
سولف عالوضع بس بكياسة
المعلم خل يموت يطبه طوبين نحير بروسنه لو بالدراسة !
ولك بيع البلابل والحمامات الحمامة تفيد لو جلب الحراسة ؟ !
ولك لو بيك حظ سويتني انسان
بسيطة أحلامي عايش عالأماني
عايش عالحجي ولساني محبوب أعيش اببيش إذا كصوا لساني ؟
حلم عندي اعوف الشعر وأرتاح واصفك حالي حال البرلماني !!!
__________________
تذكر كلها ختلت وكت الزماط
هسة ذيابة صارو بردت النار
لا تشتم سكفهم وانت مكشوف
يمعود يا وطن دبرلي الايجار
اصاحب كل حرامي يفيدني بيوم
وامنع كل شريف يمرلي خطار
عار يصير سهلة حملة يومين
تصير فلوس عدنا ونغسل العار
يرجف صوت كلمن رافك الجوع
ومترهي ترة يسولف العندة
ولك مشروع مشروعين ونتوب
نعامة تصير الفراش ومخدة
ياهو احسن ظمير وعايش بضيم
ابيعة واستلم بالشهر شدة
ازرع قنبلة يا شعر ترتاح
ترة اني تقشمرت من كلت وردة

المصدر
هلو حبيبي